"I wol yow telle, as was me taught also, The foure spirites and the bodies sevene, By ordre, as ofte I herde my lord hem nevene. The firste spirit quiksilver called is, The seconde orpyment, the thridde, ywis, Sal armonyak, and the firthe brimstoon. The bodys sevene eek, lo! hem heer anoon: Sol gold is, and Luna silver we threpe, Mars iren, Mercurie quyksilver we clepe, Saturnus leed, and Jupiter is tyn, And Venus coper, by my fader kyn!"