"Derk was the night as pich, or as the cole, And at the window out she putte hir hole, And Absolon, him fil no bet ne wers, But with his mouth he kiste hir naked ers Ful savourly, er he was war of this. Abak he sterte, and thoghte it was amis, For wel he wiste a womman hath no berd; He felte a thing al rough and long y-herd, And seyde, ‘fy! allas! what have I do?’ ‘Tehee!’ quod she, and clapte the window to; And Absolon goth forth a sory pas. ‘A berd, a berd!’ quod hende Nicholas, ‘By goddes corpus, this goth faire and weel!’"