"Entre ces boutons en eslui Un si trés bel qu'envers celui Nul des autres rien ne prisai, Puis que je l'oi bien avisé, Car une color l'enlumine Qui est si vermeille e si fine Con Nature la pot plus faire. De fueilles i ot quatre paire, Que Nature par grant maistire I ot assises tire a tire; La queue est droite come jons, E par desus siet li boutons Si qu'il ne cline ne ne pent. L'odor de lui entor s'espant: La soatume qui en ist Toute la place replenist. E quant jou senti si flairier, Je n'oi talent de repairier, Ainz m'aprochasse por le prendre, Se j'i osasse la main tendre."