"Sororem falso dictitatam Thaidis id ipsum ignorans miles advexit Thraso ipsique donat. erat haec civis Attica. eidem eunuchum, quem emerat, tradi iubet Thaidis amator Phaedria ac rus ipse abit Thrasoni oratus biduum ut concederet. ephebus frater Phaedriae puellulam cum deperiret dono missam Thaidi, ornatu eunuchi induitur—suadet Parmeno—: intro ut iit, vitiat virginem. sed Atticus civis repertus frater eius conlocat vitiatam ephebo; Phaedriam exorat Thraso."