"Ut lea, quam saeuo fetam pressere cubili venantes Numidae, natos erecta superstat, mente sub incerta torvum ac miserabile frendens; illa quidem turbare globos et frangere morsu tela queat, sed prolis amor crudelia vincit pectora, et a media catulos circumspicit ira."

"Volucrum sic turba recentum, cum reducem longo prospexit in aere matrem, ire cupit contra summique e margine nidi extat hians, iam iamque cadat, ni pectore toto obstet aperta parens et amantibus increpat alis."

"Fulmen, io ubi fulmen?' ait. gemit auctor Apollo."

"Sic densa lupum jam nocte sub atra arcet ab apprenso pastorum turba juvenco."

"Cuncta ignibus atris damnat atrox suaque ipse parens gestamina ferri, si damnis rabidum queat exaturare dolorem."

"Nonne Hyrcanis bellare putatis tigribus, aut saeuos Libyae contra ire leones?"

"Damnatus flammae torus."

"Pro fors et caeca futuri mens hominum!"

"Cadit ardua fagus, Chaoniumque nemus, brumaeque inlaesa cupressus; Procumbunt piceae, flammis alimenta supremis, Ornique, iliceaeque trabes, metuendaque suco Taxus, et infandos belli potura cruores Fraxinus, atque situ non expugnabile robur: Hinc audax abies, et odoro uulnere pinus Scinditur, adclinant intonsa cacumina terrae Alnus amica fretis, nec inhospita uitibus ulmus."

"Ille coronatos iamdudum amplectitur ignes, fatidicum sorbens vultu flagrante vaporem."

"Ne frena animo permitte calenti, da spatium tenuemque moram, male cuncta ministrat impetus."

"Umida siccat mollibus ora comis."

"O furor, o homines diraeque Prometheos artes!"

"Laetifici plausus missusque ad sidera vulgi clamor."

"Vive, precor; nec tu divinam Aeneida tempta, sed longe sequere et vestigia semper adora."

"Juppiter, o quanta belli donabere praeda!"

"At puer in gremio vernae telluris et alto gramine nunc faciles sternit procursibus herbas in vultum nitens, caram modo lactis egeno nutricem clangore ciens iterumque renidens et teneris meditans verba inluctantia labris miratur nemorum strepitus aut obuia carpit aut patulo trahit ore diem nemorique malorum inscius et vitae multum securus inerrat."

"Dulce loqui miseris veteresque reducere questus."

"Primae decrescunt murmura noctis, cum consanguinei mixtus caligine Leti rore madens Stygio morituram amplectitur urbem Somnus et implacido fundit grauia otia cornu secernitque viros."

"Sic ubi se magnis refluus suppressit in antris Nilus et Eoae liquentia pabula brumae ore premit, fumant desertae gurgite valles et patris undosi sonitus expectat hiulca Aegyptos, donec Phariis alimenta rogatus donet agris magnumque inducat messibus annum."

"O mihi desertae natorum dulcis imago, Archemore, o rerum et patriae solamen ademptae seruitiique decus, qui te, mea gaudia, sontes extinxere dei, modo quem digressa reliqui lascivum et prono uexantem gramina cursu? heu ubi siderei vultus? ubi verba ligatis imperfecta sonis risusque et murmura soli intellecta mihi? quotiens tibi Lemnon et Argo sueta loqui et longa somnum suadere querela!"

"Non ratus ore sacerdos, damnataeque preces."

"Stat super occiduae nebulosa cubilia Noctis Aethiopasque alios, nulli penetrabilis astro, lucus iners, subterque cavis graue rupibus antrum it uacuum in montem, qua desidis atria Somni securumque larem segnis Natura locavit. limen opaca Quies et pigra Oblivio servant et numquam vigili torpens Ignauia vultu. Otia vestibulo pressisque Silentia pennis muta sedent abiguntque truces a culmine ventos et ramos errare vetant et murmura demunt alitibus. non hic pelagi, licet omnia clament litora, non ullus caeli fragor; ipse profundis vallibus effugiens speluncae proximus amnis saxa inter scopulosque tacet: nigrantia circum armenta omne solo recubat pecus, et nova marcent germina, terrarumque inclinat spiritus herbas. mille intus simulacra dei caelaverat ardens Mulciber: hic haeret lateri redimita Voluptas, hic comes in requiem vergens Labor, est ubi Baccho, est ubi Martigenae socium puluinar Amori obtinet. interius tecti in penetralibus altis et cum Morte jacet, nullique ea tristis imago cernitur. hae species. ipse autem umentia subter antra soporifero stipatos flore tapetas incubat; exhalant vestes et corpore pigro strata calent, supraque torum niger efflat anhelo ore vapor; manus haec fusos a tempore laevo sustentat crines, haec cornu oblita remisit."

"Unde iste per orbem primus venturi miseris animantibus aeger crevit amor? divumne feras hoc munus, an ipsi, gens avida et parto non umquam stare quieti, eruimus quae prima dies, ubi terminus aevi, quid bonus ille deum genitor, quid ferrea Clotho cogitet? hinc fibrae et volucrum per nubila sermo astrorumque vices numerataque semita lunae Thessalicumque nefas. at non prior aureus ille sanguis avum scopulisque satae vel robore gentes mentibus his usae; silvas amor unus humumque edomuisse manu; quid crastina volveret aetas scire nefas homini. nos, pravum et flebile vulgus, scrutati penitus superos."

"Quantus equis quantusque viris in puluere crasso sudor! io quanti crudele rubebitis amnes!"

"Primus in orbe deos fecit timor."

"Plurima versat, pessimus in dubiis augur, timor."

"O caeca nocentum consilia! o semper timidum scelus!"

"Clamorem, bello supremus apertis urbibus."

"Illum Palladia sonipes Nemeaeus ab arce devehit arma pavens umbraque inmane volanti implet agros longoque attollit pulvere campum."

"Tela manu, reicitque canes in vulnus hiantes."

"Exedere animum dolor iraque demens et, qua non gravior mortalibus addita curis, spes, ubi longa venit."

"Stare adeo miserum est, pereunt vestigia mille ante fugam, absentemque ferit grauis ungula campum."

"Non parcit populis regnum breve."

"Ille velut pecoris lupus expugnator opimi, pectora tabenti sanie grauis hirtaque saetis ora cruentata deformis hiantia lana, decedit stabulis huc illuc turbida versans lumina, si duri comperta clade sequantur pastores, magnique fugit non inscius ausi."

"In speculis Mors atra sedet dominoque silentes adnumerat populos; maior superinminet ordo. arbiter hos dura versat Gortynius urna vera minis poscens adigitque expromere vitas usque retro."

"Auro mansueverat ungues."

"Pluraque laxato ceciderunt sidera caelo."

"Paret Atlantiades dictis genitoris et inde summa pedum propere plantaribus inligat alis obnubitque comas et temperat astra galero. tum dextrae uirgam inseruit, qua pellere dulces aut suadere iterum somnos, qua nigra subire Tartara et exangues animare adsueuerat umbras. desiluit, tenuique exceptus inhorruit aura. nec mora, sublimes raptim per inane volatus carpit et ingenti designat nubila gyro."

"Radiant majore sereno culmina et arcano florentes lumine postes. postquam jussa quies siluitque exterritus orbis, incipit ex alto: grave et inmutabile sanctis pondus adest verbis, et vocem fata sequuntur."

"Sed nec puniceo rediturum nubila caelo promisere jubar, nec rarescentibus umbris longa repercusso nituere crepuscula Phoebo: densior a terris et nulli peruia flammae subtexit nox atra polos."

"Tacitumque a principe vulgus dissidet, et, qui mos populis, venturus amatur."

"Quid si peteretur crimine tanto limes uterque poli, quem Sol emissus Eoo cardine, quem porta vergens prospectat Hibera, quasque procul terras obliquo sidere tangit avius aut Borea gelidas madidive tepentes igne Noti?"

"Aliquis, cui mens humili laesisse veneno summa nec impositos umquam ceruice volenti ferre duces."

"Ac velut hiberno deprensus navita ponto, cui neque Temo piger neque amico sidere monstrat Luna vias, medio caeli pelagique tumultu stat rationis inops, jam jamque aut saxa malignis expectat summersa vadis aut vertice acuto spumantes scopulos erectae incurrere prorae."

"Impia jam merita scrutatus lumina dextra merserat aeterna damnatum nocte pudorem Oedipodes longaque animam sub morte trahebat. illum indulgentem tenebris imaeque recessu sedis inaspectos caelo radiisque penates seruantem tamen adsiduis circumuolat alis saeva dies animi, scelerumque in pectore Dirae."

"Fraternas acies alternaque regna profanis decertata odiis."