"Some men haue said that it were good for the kyng, that the commons of Englande were made pore, as be the commons of Fraunce. For than thai wolde not rebelle, as now thai done oftentymes; wich the commons of Fraunce do not, nor mey doo; for thai haue no wepen, nor armour, nor good to bie it with all. To theis maner of men mey be said with the phylosopher, ad pauca respicientes de facili ennnciant. This is to say, thai that see but few thynges, woll sone say thair advyses. For soth theis folke consideren litill the good of the reaume of Englond, wherof the myght stondith most vppon archers, wich be no ryche men. And yf thai were made more pouere than thai be, thai shulde not haue wherwith to bie hem bowes, arroes, jakkes, or any other armour of defence, wherby thai myght be able to resiste owre enymes, when thai liste to come vppon vs; wich thai mey do in euery side, considerynge that we be a Ilelonde; and, as it is said before, we mey not sone haue soucour of any other reaume. Wherfore we shull be a pray to all owre enymyes, but yf we be myghty of owreself, wich myght stondith most vppon owre pouere archers; and therfore thai nedun not only haue suche ablements as now is spoken of, but also thai nedun to be much excersised in shotynge, wich mey not be done withowt ryght grete expenses, as euery man experte therin knowith ryght well. Wherfore the makyng pouere of the commons, wich is the makyng pouere of owre archers, shalbe the distruccion of the grettest myght of owre reaume."