"I woll tell you an ensaumple of a woman that ete the good morsell in the absence of her husbonde. Ther was a woman that had a pie in a cage, that spake and wolde tell talys that she saw do. And so it happed that her husbonde made kepe a gret ele in a litell ponde in his gardin, to that entent to yeue it sum of his frendes that wolde come to see hym; but the wyff, whanne her husbond was oute, saide to her maide, 'late us ete the gret ele, and y will saie to my husbond that the otour hathe eten hym;' and so it was done. And whan the good man was come, the pye began to tell hym how her maistresse had eten the ele. And he yode to the ponde, and fonde not the ele. And he asked his wiff wher the ele was become. And she wende to have excused her, but he saide her, 'excuse you not, for y wote well ye have eten yt, for the pye hathe told me.' And so ther was gret noyse betwene the man and hys wiff for etinge of the ele. But whanne the good man was gone, the maistresse and the maide come to the pie, and plucked of all the fedres on the pyes hede, saieng, 'thou hast discovered us of the ele;' and thus was the pore pye plucked. But ever after, whanne the pie sawe a balled or a pilled man, or a woman with an high forhede, the pie saide to hem, 'ye spake of the ele.' And therfor here is an ensaumple that no woman shulde ete no lycorous morcelles in the absens and withoute weting of her husbond, but yef it so were that it be with folk of worshipp, to make hem chere; for this woman was afterward mocked for the pye and the ele."