"So clene lond is Engelond · and so cler withouten hore, The veireste men in the world · ther inne beth ibore, So clene and vair and pur ȝwit · among other men hii beth, That me knoweth hem in eche lond · bi seȝte thar me hem seth · So clene is al so that lond · and mannes blood so pur · That the gret evel ne cometh naȝt ther · that me ciupeth that holi fur · That vorfreteth menne limes · riȝt as it were ibrende · Ac men of ffrance in thulke vuel · sone ne sueth amende Ȝif hii beth ibroȝt in to Engelond · ȝware thorȝ me may iwite That Engelond is londe best · as it is iwrite."