"Engelond his a wel god lond · ich wene ech londe best · Iset in the on end of the · worlde as al in the west · The se geth him al aboute · he stond as in an yle · Of fon hii they dorre the lasse doute — bot hit be thorȝ gyle. Of folc of the sulve lond · as me hath iseye ȝwile · From southe to north he is long · eiȝte hondred mile · And tuo hondred mile brod · from est to west to wende · Amid the lond as hit be · and noȝt as bi the on ende · Plente me may in Engelond · of alle gode ise · Bote volc hit vorgulte · other ȝeres the worse be · Vor Engelond is vol inoȝ · of frut and ek of tren · Of wodes and of parkes · that joye hit is to sen · Of foweles and of bestes · of wilde and tame also · Of salt fichȝ and eke verss · of vaire riuers there to · Of wellen suete and cold inouȝ · of lesen and of mede · Of seluer or and of gold · of tyn and eke of lede · Of stel of yre and of bras · of god corn gret won · Of wit and of wolle god · betere ne may be non · Wateres he hath ek inouȝ · ac at uore alle othere thre · Out of the lond into the se · armes as thei it be · Ȝware bi the ssipes mowe come · fram the se and wende · And bring alonde good inoȝ · aboute in eche ende."