"Et dum transivimus per villam de Peronne muratam, quam propè relinquimus à sinistris nostris, comperimus equites Gallicani exercitûs se offerentes de villâ versùs nostros, ut nos fortè ad infra jactus hostiles et nocumenta traxissent; sed oppugnantibus equitibus nostris citò terga verterunt, oppidum repetentes. Et postquam pertransivimus villam, quasi ad milliare, invenimus vias mirabiliter tritas per Gallicanum exercitum quasi nos in multis millibus præcessissent. Et tunc nos qui fuimus residuus populus, ut de potestatibus taceam, timentes prælium imminens, corda et oculos in cælum levavimus, clamantes intimæ considerationis vocibus, ut compateretur nostri Deus, et à nobis de suâ ineffabili pietate Gallorum violentias declinaret."