"Chremetis frater aberat peregre Demipho relicto Athenis Antiphone filio. Chremes clam habebat Lemni uxorem et filiam, Athenis aliam coniugem et amantem unice fidicinam gnatum. mater e Lemno advenit Athenas; moritur; virgo sola (aberat Chremes) funus procurat. ibi eam cum visam Antipho amaret, opera parasiti uxorem accipit. pater et Chremes reversi fremere. dein minas triginta dant parasito, ut illam coniugem haberet ipse: argento hoc emitur fidicina. uxorem retinet Antipho a patruo adgnitam."