"The kynge must be thus maad. For he must sytte in a chayer clothyd in purpure, crowned on his heed, in his right hond a ceptre, and in the lift honde an apple of golde, for he is the most grettest and hyest in dygnyté above al other and most worthy. And that is signyfyed by the corone, for the glorie of the peple is the dygnyté of the kyng. And above al other the kyng ought to be replenysshed with vertues and of grace. And this signyfieth the purpure, for in like wyse as the robes of purpure maketh fayr and enbelissheth the body, the same wyse vertues makyth the sowle."