Rutilius Claudius Namatianus

"Exaudi, regina tui pulcherrima mundi, inter sidereos Roma recepta polos, exaudi, genetrix hominum genetrixque deorum, non procul a caelo per tua templa sumus."

"Fecisti patriam diversis gentibus unam: profuit iniustis te dominante capi. dumque offers victis proprii consortia iuris, urbem fecisti quod prius orbis erat."

"Quod regnas minus est quam quod regnare mereris: excedis factis grandia fata tuis."

"Percensere labor densis decora alta tropaeis ut si quis stellas pernumerare velit; confunduntque vagos delubra micantia visus: ipsos crediderim sic​ habitare deos."

"Atque utinam numquam Iudaea subacta fuisset Pompeii bellis imperiisque Titi! latius excisae pestis contagia serpunt, victoresque suos natio victa premit."

"Impulsus furiis homines terrasque reliquit et turpem latebram credulus exsul adit, infelix putat illuvie caelestia pasci seque premit laesis saevior ipse deis. num, rogo, deterior Circaeis secta venenis? tunc mutabantur corpora, nunc animi."